بو گئجه بيعت پوزولدي آشنالر گئتديلر قويدولار پيغمبر اوغلون بي‌وفالر گئتديلر
منبر اوستونده حسين بن علي صاحب وقار شوريلـه منشـور عـاشوراني ائتـدي آشكار
روشن اولدي صبح آچيلسا قتل وار كشتاروار عشـق دنيـاي فنايـه مبتـلالر گئتـديلر
شبپـره مثلـي تمتـع گورديلر ظلماتيدن خير محضي نفي ائدوب ال‌چكديلر اثباتدن
كعبـۀ آمــاليده آيريلديـلار ميقــات‌دن گيمه‌ميش احرامني حاجي نمالر گئتديلر
بولديلر يوخدور حسينه يوم عاشورا ظفر بوي مرگي درك ائدوب سسلنديلر اين المفر
مين نفر حضاردن قالدي فقط يئتميش نفر قالـب غيرتلـري بـي‌محتوالـر گئتـديلر
نقل ائدور شخصاً سكينه شاه دينون دختري قيلدي فرمايش بابام سوندورديلر مشعل‌لري
آز زماندا خالـي اولدي خيمه‌لر دور و بري بش‌بش اون‌اون اهل تزوير و ريالر گئتديلر
صبح آچيلدي الغرض وئردي قالانلار امتحان كهنه عاشق‌لر تاپوبلار عشق حقدن تازه جان
لبلـري گل مثلي خندان و ئوره‌كلر شادمان كوي جانانـه سليــم‌المدعالـر گئتديلر
نه مهاجردن قالوب بير كيمسه نه انصاردن بيربه‌بيـر دلبرلـر آيريلدي گوزه‌ل دلداردن
عشق و سرمستي گئچوب اندازه‌دن معياردن كيمياگر قالدي حيران، كيميالر گئتديلر
آلدي رخصت ائتدي اكبر في سبيل‌الله جهاد ياره‌لندي زينـدن دوشدي يئره اول پاكزاد
قرمزي ژاله ايلـه آغ‌گل ائتدي گويا اتحاد حالـدن يكسر مقيمـان سمالر گئتديلر
في المثل خاك بلايه پاره‌لنميش آي دوشوب عالم غيب و شهوده قورخلي بير هاي دوشوب
گوش جناتـه صداي ناله و ايواي دوشوب بارگاه قـدس اعلايه صـدالر گئتديلر
جـان بلب مظلـوم امامـه ايلدي اكبر سلام اوغلونون آلدي سلامين سسلنوب گلديم بالام
خيمه‌دن چيخدي حسين ائتدي جوانلار ازدحام قتلگاهـه سـاري اهل ابتـلالر گئتديلر
چاتـدي ميدانـه حسيـن ديلده علي‌‌اكبر آدي جان دئدي، اوغلوم سني هانسي قلجدي دوغرادي
نـوح تك عمر ايلسم اولمازمنه سن‌سيز دادي گوزلريمده يير وقتيمده ضيالر گئتديلر
باشـون اوستـه يـاوران طيب انفاسيم گلور گوزلرينـده گوزياشـي ديداره عباسيم گلور
يولداشون هم مسلكون هم صحبتون قاسم گلور گل ديلـه يارا و طاقتدن فتالر گئتديلر
چوخدي سؤز كئچدوم مفصل‌دن بو يئرده مجمله اوغلونون اعضاسيني گوردي حسين گلمز اله
حمليني مشكل بولـوب سالدي عباسين مقتله وئردي بير فرمان گؤيه يئردن نوالر گئتديلر
اي جوانلار حمل ائدون قارداشوزي ميدانيدن دردمندم چاره‌سيز ال اوزمـوشم درمانيدن
گوز تيكن چوخدور يولا نسواندن طفلانيدن خيمه‌لرده اوزلريندن بي‌نوالر گئتديلر
حامل اولدي آل هاشم پرپر اولموش لاليه باغبانون اشكي گل هجرينده دوندي ژاليه
تلــدن انديرديلــر گلـدي حرملـر نـاليه قاره باشدا ياسينه بختي قرالر گئتديلر
آچديلار قانلي عباني سس دوشوب داغداشلارا باخديلا الوان اولان مژگانلارا گوز قاشلارا
گورديلر باشدا ياراسين گئتدي اللر باشلارا تاب و طاقتدن بالالار هم آنالار گئتديلر
شاعر: انور
